Söngkonan Emilía Hugrún og rapparinn ISSI sendu frá sér nýtt lag á föstudaginn og hefur það fengið frábærar viðtökur. Lagið, sem nefnist Vítamín, rauk upp íslenska topplistann á Spotify og sat í efsta sætinu í gær.
„Ég fékk skilaboð frá ISSA um að hann væri með hugmynd að lagi. Ég og Steini félagi minn höfðum verið að gera lag með Blaffa sem ISSA leist vel á. Þannig að hann sendi mér demó og ég hugsaði bara, ég verð að hoppa á þetta, þetta er geðveikt. Svo bjuggum við Steini til húkk í lagið og síðan hittumst við öll með Matta pródúser og hann gerði þetta extra kúl þannig að þetta varð að lagi,“ sagði Emilía í samtali við sunnlenska.is.
Umræddir Matti og Steini eru Matthías Eyfjörð og Þorsteinn Helgi Kristinsson en Emilía og Steini hafa verið að vinna saman að tónlist að undanförnu og gáfu meðal annars út lagið Beautiful Things í mars síðastliðnum.
Og söngkonan frá Þorlákshöfn er hæstánægð með viðtökurnar sem Vítamín hefur fengið.
„Já, ég er ótrúlega þakklát, bæði fyrir viðtökurnar og líka fyrir þetta teymi sem ég var að vinna með. Við náðum öll vel saman og þetta eru yndislegir strákar. Svona kemst maður á toppinn, með því að umkringja sig með skemmtilegum hæfileikabúntum.“