Selfoss fær nýjan vettvang fyrir raftónlist og underground menningu þegar viðburðurinn Kjallarinn verður haldinn í fyrsta sinn næstkomandi laugardagskvöld. Að baki verkefninu stendur Selfyssingurinn Ágúst Helgi Jónsson, sem hefur starfað í tónlistar- og viðburðageiranum erlendis um árabil.
Ágúst Helgi, sem fæddist á Selfossi og ólst upp í Grímsnesinu, hefur undanfarin ár búið í Noregi þar sem hann hefur komið að skipulagningu tónlistarviðburða og skemmtanahalds. Nú snýr hann aftur á sinn heimavöll með metnaðarfullt verkefni sem hann segir ætlað að skapa nýja upplifun fyrir tónlistarunnendur á Íslandi.
„Mér finnst tíminn réttur. Selfoss hefur vaxið hratt og mér fannst vanta stærri vettvang fyrir raftónlist og underground menningu,“ segir Ágúst. „Viðburðurinn verður haldinn á Sviðinu, sem er fullkomin staður og þessi magnaðaði miðbær er með allt til staðar.“
Hugmyndin að Kjallaranum kviknaði út frá áhuga Ágústs á því hvernig tónlist getur sameinað fólk. Hann segir markmiðið ekki aðeins vera að halda tónleika eða skemmtikvöld, heldur að skapa heildstæða upplifun þar sem tónlist, lýsing, umhverfi og stemning mynda eina heild. „Við hugsum um upplifunina í heild. Þetta er meira en bara kvöldskemmtun.“
Rave snýst um samfélag
Aðspurður hvað orðið „rave“ þýði fyrir honum segir Ágúst að það snúist um samfélag, tónlist og sameiginlega orku. „Þarna kemur fólk saman til að upplifa eitthvað sérstakt.“
Ágúst vonast til að gestir fari heim með þá tilfinningu að hafa upplifað eitthvað nýtt og óvænt á Selfossi. Hann sér Kjallarann jafnframt sem upphafið að stærra verkefni sem geti þróast á næstu árum. „Ef þetta heppnast vel er þetta bara byrjunin. Markmiðið er að byggja upp viðburð sem getur vaxið ár frá ári. Ég vona að fólk geti síðar sagt: Ég var þarna þegar Kjallarinn byrjaði.“
Ágúst hvetur áhugasama til að tryggja sér miða og bendir á að fyrsta útgáfa viðburðarins verði einstök enda erlendir plötusnúðar á leiðinni ásamt frábærum íslenskum plötusnúðum. Á hæðunum fyrir ofan Sviðið verður tattoo upplifun og pop-up verslun, ásamt öðrum stað til að stíga dansinn.