Djöflaeyjan frumsýnd í kvöld

Við kynnumst fjölskyldunni í Gamla húsinu og fáum innsýn á kómískan en jafnframt dramatískan hátt í þann veruleika sem fólk bjó við eftir stríð. Ljósmynd/Aðsend

Leikfélag Selfoss frumsýnir Djöflaeyjuna í leikstjórn Rúnars Guðbrandssonar í Leikhúsinu við Sigtún í kvöld, föstudaginn 6. mars.

Í þessari leikgerð er unnið með sögurnar Þar sem djöflaeyjan rís og Gulleyjan eftir Einar Kárason sem og leikgerðir Leikfélags Reykjavíkur og Þjóðleikhússins.

Þetta er í þriðja sinn sem Rúnar Guðbrandsson starfar með Leikfélagi Selfoss en hann leikstýrði Sólarferð eftir Guðmund Steinsson árið 2012 og Kirsuberjagarðinum eftir Chekov árið 2017. Hann hefur sett upp fjölda sýninga hjá sjálfstæðum atvinnuleikhúsum og áhugaleikfélögum um land allt.

Djöflaeyjan er löngu orðin vel þekkt saga þar sem Reykjavík eftirstríðsáranna er í forgrunni þá sérstaklega mannlífið í braggahverfunum sem settu mikinn svip sinn á bæinn. Við kynnumst fjölskyldunni í Gamla húsinu og fáum innsýn á kómískan en jafnframt dramatískan hátt í þann veruleika sem fólk bjó við eftir stríð.

Að sýningunni koma um það bil 50 manns þar af 24 leikarar og finna má allar upplýsingar um sýningar og miðasölu á Facebooksíðu sýningarinnar.