„Dáið er alt án drauma“

Steinunn Sigurðardóttir og Harpa Rún Kristjánsdóttir. Ljósmynd af Steinunni © David Ignaszewski

Menningarsumarið heldur áfram í Bókakaffinu á Selfossi sunnudaginn 12. júlí næstkomandi. Dagskrá dagsins verður flutt tvisvar sinnum, kl. 14:00 og 15:00.

Að þessu sinni sækir dagskráin yfirskrift sína í kvæði Nóbelskáldsins, enda munu ljóðin svífa yfir vötnum.

Fjögur ljóðskáld koma fram. Rangæingarnir Brynjólfur Þorsteinsson og Harpa Rún Kristjánsdóttir munu lesa úr væntanlegum ljóðabókum sínum, en árið 2019 hlutu þau bæði verðlaun fyrir ljóð sín, Brynjólfur Ljóðstaf Jóns úr Vör og Harpa Rún verðlaun Tómasar Guðmundssonar.

Nöfnurnar Steinunn Sigurðardóttir og Steinunn Arnbjörg Stefánsdóttir lesa einnig auk þess sem sú síðarnefnda mun leika og syngja draumkennda tónlist.

Sem fyrr verður dagskráin flutt tvisvar sinnum og takmarkaður sætafjöldi er á viðburðina. Talið verður inn og eru 25 pláss í boði. Síðast komust færri að en vildu svo fólk er hvatt til þess að mæta tímanlega. Boðið er uppá ókeypis uppáhelling og te meðan á viðburðunum stendur.