Chrissie Telma Guðmundsdóttir, fiðluleikari frá Hveragerði, hlaut á dögunum Menningarverðlaun Suðurlands fyrir verkefnið Fiðlufjör.
Verðlaunin eru samfélags- og hvatningarverðlaun á sviði menningar á Suðurlandi, auglýst var eftir tilnefningum og alls skiluðu sér tilnefningar um fimmtán verkefni.
Fiðlufjör er þriggja daga fiðlunámskeið sem haldið er árlega á Hellu og Hvolsvelli. Þar koma saman nemendur, kennarar og aðstandendur alls staðar að af landinu og sameinast í gleði og krafti tónlistarinnar. Kennslu og þjálfun er sinnt af tónlistarfólki frá Suðurlandi í bland við kennara úr öðrum landshlutum. Haldnir eru tónleikar bæði á Hellu og Hvolsvelli í tengslum við námskeiðið og gefst gestum tækifæri að kynnast lífi og menningu annarra íbúa á svæðinu og taka með sér heim dýrmæta reynslu og jákvæða upplifun frá Suðurlandi.
Í greingargerð með valinu segir að Chrissie Telma hafi með verkefninu Fiðlufjör vakið verðskuldaða athygli á menningarviðburðum og gefið jákvæða mynd af Suðurlandi. Með eljusemi, dugnaði og metnaði hafi hún unnið frábært menningarstarf á Suðurlandi og hefur hvatt börn til að taka þátt í menningarstarfi á svæðinu.