Leynist gamalt jólaskraut heima hjá þér? Langar þig til að þitt jólaskraut verði varðveitt á safni? Byggðasafn Árnesinga óskar eftir gömlu skrauti frá íbúum Árnessýslu, bæði til að færa inn í safneign en einnig til að geta notað sem jólaskraut í safnahúsunum yfir jólin.
„Við erum ekki eingöngu að falast eftir afar gömlu jólaskrauti því margt áhugavert og heillandi skraut frá 20. öld gæti leynst hjá fólki sem þætti spennandi á safni. Við biðjum því fólk sem er að taka til í skrautinu sínu og hikar við að henda einhverju að endilega hugsa til safnsins. Hver veit nema eitthvað af því geti fengið framhaldslíf,“ segir í tilkynningu frá Byggðasafninu.
Þar verður sérstakur móttökudagur fyrir jólaskraut laugardaginn 12. nóvember kl. 12 – 16 í varðveisluhúsi safnsins á Búðarstíg 22 á Eyrarbakka. Einnig er hægt að vera í sambandi við safncerði á skrifstofutíma safnsins í síma 483 1082 eða í tölvupósti info@byggdasafn.is.