Næstkomandi laugardagskvöld verða sannkallaðir stórtónleikar á Sviðinu á Selfossi þar sem leik- og söngkonan Bryndís Ásmundsdóttir mun heiðra minningu Tinu Turner með einvala liði hljóðfæraleikara.
„Tónleikarnir eru mér sérstaklega hjartfólgnir. Tina Turner lést þann 24. maí 2023 og nú rúmum þremur árum síðar, langar okkur að heiðra minningu hennar og þann ótrúlega tónlistarferil sem hún skildi eftir sig,“ sagði Bryndís í samtali við sunnlenska.is.
Tónleikarnir áttu upphaflega að fara fram í júní en á meðan Bryndís var stödd í Búdapest þurfti hún óvænt að gangast undir bráðaaðgerð og varð því að fresta tónleikunum.
„Núna er ég komin aftur á fullt og er eingöngu að koma til Íslands í þessa ferð til að stíga á svið og flytja tónlist Tinu. Það gerir þessa tónleika enn persónulegri fyrir mig – þetta verður sannkölluð hylling til konu sem var einstök, bæði sem listamaður og persóna,“ segir Bryndís og bætir við að hún hafi hlustað á tónlist Tinu í langan tíma.
„Ég var 11 ára þegar ég fékk að setja plötu á plötuspilarann hjá Huldu frænku en það var What’s Love Got to Do with It platan. Ég man að ég fékk gæsahúð og Tina hefur fylgt mér alla tíð síðan. Það er mjög erfitt að velja uppáhalds lag en í dag er það We Don’t Need Another Hero. Það verður að sjálfsögðu á tónleikunum á laugardaginn en lagalistinn okkar er stútfullur af öllum bestu lögum Tinu,“ segir Bryndís að lokum.
Með henni á sviðinu verður sannkallað stórskotalið tónlistarmanna; Selfyssingurinn Vignir Þór Stefánsson á hljómborð, Einar Þór Jóhannsson á gítar, Steinar Sigurðarson á saxófón, Birgir Kárason á bassa og Ólafur Hólm Einarsson á trommur.
