Blokkflautu- og grunnskólakennarinn Ingibjörg Birgisdóttir sendi nýlega frá sér sína fjórðu barnabók sem ber heitið Litaævintýri Siggu og Dóra.
Ingibjörg hefur áður sent frá sér barnaljóðabækur sem innihélt stök ljóð en í þetta sinn ákvað hún að semja sögu í bundnu máli.
„Bókin fjallar um systkinin Siggu og Dóra og söguþráðurinn spannar heilan dag. Þau vakna um miðja nótt, þegar allt er grátt og hljótt, og stelast út að leika. Þau sofna út á hlaði en vakna síðan í gulu sólskininu um morguninn og sögunni lýkur í appelsínugulu sólsetri,“ segir Ingibjörg í samtali við sunnlenska.is.
Hver kafli byggir á einum lit
Ingibjörg segir að upphaflega hugmyndin hafi verið að gera einfalda bók með litlum texta fyrir yngstu börnin á leikskólanum, til að kenna þeim litina. „En strax á fyrsta kafla tók sköpunin völdin og textinn varð miklu efnismeiri en ég lagði upp með.“
„Bókin er þannig byggð upp að hver kafli byggir á einum lit, ákveðinni tilfinningu og/eða stemningu og hefur sitt eigið ljóðform. Ég notaði litina til að ramma söguna inn: Grár, gulur og appelsínugulur voru auðveldir í sólarhringinn og bleikur varð að draumi. Hinir litirnir (brúnn, grænn, blár, rauður og hvítur) virka svo eins og lítil saga inn í stærri sögu. Fjólublár og svartur hafa einnig sinn kafla.“
Ingibjörg segir að hún leggi mikinn metnað í að halda í íslensku ljóðahefðina með stuðla, höfuðstafi og rím. „Ég vanda mig við að allt sé rétt kveðið. Börn elska hrynjandi og rím og njóta þess að hlusta á bundið mál lesið upphátt löngu áður en þau skilja hvert einasta orð.“
Gott að geta hvílt sig algjörlega á tækninni
„Bókina er hægt að nota sem kveikju að alls kyns umræðum eins og t.d. um tilfinningar. Hvítur er t.d. fyrirgefningin. Sigga verður græn af öfund í græna kaflanum af því hún finnur ekki laufblöð, en Dóri var líka eigingjarn og vildi ekki deila. Mér fannst mikilvægt að bæði systkinin segðu fyrirgefðu og bættu fyrir brotið — sjaldan veldur einn er tveir deila.“
„Ég er afskaplega montin af því að hvorki tölvur né símar koma við sögu. Það var í raun tilviljun, en þetta varð að ákveðinni nostalgíusögu fyrir mér — svona eins og ég sá lífið í sveitinni fyrir mér þegar ég var lítil. Það er gott að geta hvílt sig algjörlega á tækninni í lestrinum og bara hreinlega gefa henni ekkert pláss.“
Eins og með fyrri bækur Ingibjargar þá sér listakonan Natalia Yacuzzi um að myndskreyta bókina. „Samskiptin fara öll fram með tölvupósti en hún náði litunum og stemningunni ótrúlega vel. Mér fannst svo skemmtilegt að senda henni textann og sjá hvernig hún útfærði litina. Það er alltaf svo spennandi þegar myndirnar fara að birtast við textann.“
Útgáfuhóf 5. september
Litaævintýri Siggu og Dóra er ætluð leikskólabörnum og börnum í yngstu bekkjum grunnskóla. Bókin gæti einnig höfðað til allra sem hafa gaman af bundnu máli. Hún er nú þegar komin í sölu á skjalda.is, í Bókabúð Forlagsins, helstu verslunum Pennans Eymundsson og í Bókakaffinu á Selfossi.
Útgáfuhóf verður haldið í Bókasafninu á Selfossi, laugardaginn 5. september kl. 11:00. Boðið verður upp á léttar veitingar, upplestur, söng og föndur fyrir börnin, auk þess sem hægt verður að tryggja sér áritað eintak á kynningarafslætti. Viðburðurinn er öllum opinn og börn sérstaklega velkomin.
Sýnishorn úr bókinni (úr kaflanum Grár):
Systkinin eru vöknuð og eru að stelast út að leika
Bæði Dóri og Sigga nú komin eru á kreik,
kanna vilja heiminn og fara í einn leik.
Börnin litlu gægjast fram á ganginn smeyk,
þótt grá og dauf sé birtan, þau hugrökk standa keik.
Dóri nær í teppi: Taktu þetta hér,
trítlar út úr húsi: Sigga flýttu þér!
Gráa tuskufílinn hún faðmar þétt að sér,
fer af stað og kallar: Bíddu eftir mér!