Kvikmyndahátíð barnanna, Kids for films, verður haldin í Bíóhúsinu á Selfossi helgina 10. til 11. október og er hluti af dagskrá menningarmánaðarins október í Sveitarfélaginu Árborg.
Á hátíðinni verða sýndar tuttugu stuttmyndir frá ýmsum löndum en markmiðið með hátíðinni er að skapa vettvang þar sem börn geta uppgötvað nýjar sögur, kynnst ólíkum menningarheimum og upplifað kvikmyndir saman.
„Mig langaði að skapa vettvang þar sem börn fá ekki bara að horfa á kvikmyndir heldur taka líka virkan þátt í kvikmyndahátíðinni sjálfri. Þau fengu að velja myndir, koma með hugmyndir og hafa áhrif á hvernig hátíðin verður,“ segir Sandra Steinþórsdóttir, stofnandi Kids for films.
Tíu krakkar úr Árborg hafa tekið virkan þátt í undirbúningi hátíðarinnar og völdu þau tuttugu myndir til sýningar úr hópi áttatíu innsendra stuttmynda.
Þátttaka barnanna nær þó lengra en að velja myndirnar, þau unnu sjálf að hönnuninni á merki hátíðarinnar, verðlaunagripa og annars markaðsefnis. Með þessu fá þau tækifæri til að hafa raunveruleg áhrif á útlit og framkvæmd hátíðarinnar og kynnast ólíkum hliðum þess að skapa og reka menningarviðburð.
Opnar dyr inn í ólíka heima
Sandra hefur mikinn áhuga á sköpun og miðlalæsi barna og með hátíðinni vill hún skapa vettvang fyrir samræðu, sköpun og nýjar hugmyndir.
„Við viljum hvetja börn til að horfa, hugsa, spyrja og deila. Kvikmyndir geta opnað dyr inn í ólíka heima og gefið börnum tækifæri til að sjá heiminn frá nýju sjónarhorni,“ segir Sandra.
Frítt er á hátíðina á meðan húsrúm leyfir en bæði á laugardag og sunnudag verða þrjár sýningar, klukkan 11, 13 og 15 og ættu allir að finna eitthvað við sitt hæfi. Sýningin klukkan 15 á laugardag er hátíðarsýning, þar sem krakkar kynna myndir og sérstakur gestur er leikstjórinn Saga María, sem kynnir mynd sína Föstudagurinn þrettándi.
Kids for Films er haldin í samstarfi við Cinema ehf., rekstraraðila Bíóhússins á Selfossi, með stuðningi frá SASS, Kvikmyndamiðstöð Íslands og Sveitarfélaginu Árborg.
Hér má skoða dagskrá hátíðarinnar
