Bókaupplestur og jólasýning

Bókaupplestur verður í Húsinu á Eyrarbakka í dag og hefst kl. 16 í stássstofunni. Jólasýning Byggðasafns Árnesinga er einnig opin í dag frá kl 13.00 til 16.00. Jólakaffi verður á boðstólunum.

Fjórir rithöfundar lesa úr verkum sínum, Þór Magnússon fyrrv. þjóðminjavörður segir frá ritinu Íslenzk silfursmíð. Sigríður Jónsdóttir í Arnarholti les úr ljóðabók sinni Undir ósýnilegu tré. Þórunn Erla Valdimarsdóttir kynnir og les úr skáldsögunni Stúlka með maga. Guðni Ágústsson kynnir bók sína Léttur í lund og segir skemmtilegar sögur af sjálfum sér og öðrum.