Bækur og bakkelsi í Húsinu á Eyrarbakka

Gestir fá sér af glæsilegu kökuhlaðborði hjá námsmeyjum Húsmæðraskóla Suðurlands á Laugarvatni árið 1981. Ljósmyndari: Ottó Eyfjörð.

Sýningaropnun sýningarinnar „Bækur og bakkelsi“ verður í Húsinu á Eyrarbakka laugardaginn 7. september kl 16:00.

Sýningin er unnin af Héraðsskjalasafni Árnesinga og er útgangspunktur hennar handskrifaðar uppskriftabækur sem varðveittar eru á skjalasafninu.

Gamlar aðferðir gegn matarsóun
Uppskriftirnar í bókunum segja ótal margt um tíðaranda, tísku, aðgang að hráefni, nýtni og hagsýni. Á sýningunni verður saga baksturs jafnframt rakin auk þess sem húsmæðrafræðsla á Suðurlandi verður skoðuð.

Það ætti enginn að láta sig vanta á sýningaropnunina því þar verður boðið uppá nokkrar vel valdar kökur sem bakaðar eru eftir uppskriftum úr bókunum. Uppskriftirnar voru valdar með það að leiðarljósi að kynna gesti fyrir gömlum aðferðum gegn matarsóun enda málefnið tíðrætt í fjölmiðlum þessa dagana.

Óskrifuð uppskriftarbók á sýningunni
Vert er að geta þess að á sýningunni mun liggja frammi auð stílabók þar sem gestum og gangandi gefst tækifæri til þess að skrifa sínar eigin uppskriftir. Sú bók mun í framhaldinu verða varðveitt á Héraðsskjalasafni Árnesinga og verða þar heimild til framtíðar um bakstursvenjur ársins 2019.

Sýningin Bækur og bakkelsi mun standa uppi út september á opnunartíma Byggðasafnsins, 11-18 alla daga.