Jón Bjarnason, dómorganisti í Skálholti og Pétur Nói Stefánsson, organisti við Eyrarbakkakirkju og fleiri kirkjur í Flóanum, munu halda Bach tónleika í Skálholtsdómkirkju næstkomandi laugardag, þann 21. mars klukkan 17.
Tilefnið er ærið, 21. mars er fæðingardagur Johann Sebastian Bach (1685–1750), sem er eitt merkasta tónskáld tónlistarsögunnar.
Á tónleikunum munu þeir Jón og Pétur Nói flytja tónlist eftir Bach á orgel og flygil. Verk hans fyrir orgel og hljómborð eru meðal hápunkta vestrænnar tónlistar og lifa áfram í flutningi tónlistarmanna um allan heim.
„Bach er eitt áhrifamesta tónskáld tónlistarsögunnar og starfaði sjálfur sem organisti mestalla ævi. Á þessum tónleikum verður einnig leikið á flygil, þótt slíkt hljóðfæri hafi ekki verið til á tímum Bachs. Uppáhaldshljóðfæri hans var að vísu klavikord, en ég er þess fullviss að Bach hefði kunnað vel að meta Steinway-flygilinn sem við njótum í Skálholti í dag,“ segir Jón í samtali við sunnlenska.is.