Tónleikarnir Árbakkinn sólstöðuhátíð fóru fram á fjölskyldu- og útivistarsvæðinu í Nesi á Hellu við góðar undirtektir gesta á þjóðhátíðardaginn. Þetta er í annað sinn sem hátíðin er haldin.
„Hátíðin tókst alveg með eindæmum vel. Tónlistin fór vel í tónleikagesti sem nutu sín í skemmtilegu umhverfi í fallegu veðri og létu ekki örfáa regndropa skemma upplifunina fyrir sér,“ sagði Bjarki Eiríksson, forvígismaður hátíðarinnar í samtali við sunnlenska.is.
„Árbakkinn sólstöðuhátíð er að skipa sér sess í menningarlífi sveitarfélagsins, og sýslunni allri og er vonandi komin til að vera,“ bætti Bjarki við.
Fram komu tónlistarmenn búsettir í Rangárvallasýslu, sem fluttu fjölbreytta dagskrá þar sem þekkt lög og frumsamið efni fóru saman. Meðal þeirra sem stigu á svið voru Hófí Samúels og Rakel Páls, Vigdís Lilja, Svala Norðdahl, Bjarki Eiríksson, Valborg Ólafs, Björn Leó og Kristinn Ingi.

Ljósmyndirnar hér fyrir neðan tók Hjörtur Leví Pétursson – nema kannski tvær.
