Guðrún Arndís Tryggvadóttir myndlistarmaður, hefur skipulagt hraðnámskeið í teikningu í Skrúfunni – grósku og sköpunarmiðstöð á Eyrarbakka.
Hraðnámskeiðið er í fjórum hlutum og snýst um að ná tökum á formum og hlutföllum, að geta teiknað fólk leikandi, að plata augað og gefa rými til kynna auk þess að þróa eigin hugmyndir.
„Mín reynsla er sú að hægt sé að leiðbeina þannig að allir geti yfirstigið hræðslu sem varð til einhverntíma á ævinni um að kunna ekki að teikna. Það hafa ekki allir mikinn tíma til að sækja námskeið langt í burtu en langar samt að tileinka sér ákveðna færni þannig að hraðnámskeiðið er fyrir byrjendur og alla þá sem vilja læra að njóta þess að teikna,“ segir Guðrún og bætir við að það að teikna sé ekki bara list, heldur aðferð til að rannsaka og leysa úr læðingi.
„Teikning er ein af grunnþörfum manneskjunnar, beinasta leiðin frá huga til handar. Teikning er tjáningarmiðill sem við höfum öll þörf fyrir og getum lærst svo mikið af, bæði um okkur sjálf og um heiminn í kringum okkur,“ segir Guðrún.
Námskeiðið er haldið í samvinnu við Skrúfuna á Eyrarbakka á fjórum laugardagsmorgnum frá kl. 10:00 til 12:15. Fyrsta námskeiðið byrjar þann 16. september og heldur síðan áfram þar til í byrjun nóvember.
Allar frekari upplýsingar veitir Guðrún í síma 8635490 eða á netfanginu gudrun@tryggvadottir.com.