Tónlistarskóli Árnesinga setur upp ævintýraóperu, Allskynsóperuna, í Menningarsal Art Hostel í Hólmarastarhúsinu á Stokkseyri í dag og á morgun.
Fær þema vetrarins, 3+, að njóta sín vel, því þátttakendur verða yfir 150 talsins. Þar koma fram flestar hljómsveitir skólans og fjölmargir samspilshópar, auk söngvara og einleikara.
Söguþráður óperunnar er margslunginn, en þar fléttast saman ævintýri, þjóðsögur og sögupersónur víða að. Verður spennandi að sjá hvernig tónlistin fléttast inn í söguþráðinn.
Fyrstu tónleikarnir eru í kvöld kl. 19:00 en á morgun, laugardag verða tónleikar kl. 14:00 og 17:00. Aðgangur að tónleikunum er ókeypis og allir hjartanlega velkomnir.