Meistaramót Íslands í eldri aldursflokkum í frjálsíþróttum fór fram á Selfossi um síðustu helgi og sá frjálsíþróttaráð HSK um framkvæmd mótsins.
Fjórtán keppendur af sambandssvæði HSK tóku þátt í mótinu og unnu þeir til fjölda verðlauna. HSK vann stigakeppni þátttökuliða með miklum yfirburðum, hlaut samtals 276,5 stig, FH varð í öðru sæti með 93 stig og UFA í þriðja með 87 stig. Ármann og Breiðablik komu svo þar á eftir með 86 og 78 stig.
Alls voru 23 HSK met sett eða bætt um helgina og nokkur þeirra voru jafnframt landsmet.
Ingibjörg Markúsdóttir, Þjótanda, tvíbætti HSK metið í lóðkasti í flokki 40-44 ára, kastaði lengst 9,67.
María Ben Ólafsdóttir, Selfossi, setti HSK met í 200 metra hlaupi í flokki 50-54 ára, hljóp á 62,93 sek.
Kristín Björg Albertsdóttir, Selfossi, tvíbætti nokkra vikna gamalt met Ragnheiðar Högnadóttur í spjótkasti í flokki 60-65 ára, kastaði 15,83 m. Yngvi Karl Jónsson, Garpi, setti þrjú HSK met í langstökki í 60-64 ára flokki, stökk lengst 3,12 metra.
Í 65-69 ára setti Páll Jökull Pétursson, Selfossi, HSK met í langstökki og raunar þríbætti hann metið, en hann stökk lengst 3,08 metra. Þá þríbætti hann eigið met í spjótkasti, lengst flaug spjótið 25,73 metra.
Árný Heiðarsdóttir, Selfossi, setti samtals sjö HSK met í þremur greinum í flokki 70-74 ára og metin öll eru einnig landsmet í viðkomandi grein. Hún kastaði sleggjunni lengst 28,22 metra, i lóðkasti þríbætti hún metið, kastaði lengst 10,93 metra og kúlan flaug lengst 8,31 metra.
Þá tvíbætti Guðmundur Kr. Jónsson, Selfossi, HSK metið í lóðkasti í flokki 75-79 ára, kastaði lengst 9,56 metra. Árni Einarsson, Selfossi og Sigmundur Stefánsson, Þjótanda, áttu saman gamla metið sem var 8,86 metrar. Guðmundur Kr., sem er heiðursformaður HSK, tók fram keppnisskóna í vor eftir 45 ára hlé og setti þá 13 HSK met á tveimur mótum innanhúss. Þess má geta að elsta HSK met Guðmundar, sem enn stendur, er í þrístökki 18-19 ára utanhúss og var sett á Laugarvatni 12. júlí 1965. Það er því 61 ár á milli nýjustu og elstu gildandi meta, sem er án efa HSK met.
Heildarúrslit mótsins má nálgast á vef FRÍ.