Eins og alkunna er fer þessa dagana fram Heimsmeistaramótið U-19 handboltalandsliða í Jekaterínborg í Rússlandi. Selfyssingar eiga þar nokkra fulltrúa sem hafa staðið sig vel á mótinu.
Með liðinu spila þeir Elvar Örn Jónsson og Ómar Ingi Magnússon, þjálfari landsliðsins er síðan Einar Guðmundsson yfirþjálfari Selfoss og sjúkraþjálfari liðsins er Jón Birgir Guðmundsson. Í leikmannahópnum er einnig Egill Magnússon, en hann er sonur Selfyssingsins Magnúsar Sveins Sigurðssonar, fyrrum landsliðsmanns og leikmanns Selfoss og Stjörnunnar.
Liðinu hefur gengið mjög vel á mótinu, hefur unnið alla leiki sína sjö að tölu og er liðið því komið í undanúrslit mótsins þar sem strákarnir mæta Slóveníu kl. 10:30 á miðvikudagsmorgun.
Á heimasíðu Umf. Selfoss er viðtal við þá Elvar og Ómar en þeir segja að liðið eigi góða möguleika í undanúrslitaleiknum „ef við náum að spila okkar leik.“
Aðspurðir hvers vegna þeir hefðu náð þetta langt sögðust þeir hafa æft mjög lengi handbolta og „við erum búnir að leggja mikla vinnu í þetta sport og erum alltaf að leita að leiðum til að bæta okkur.“
Maturinn að þeirra sögn mætti nú vera betri, „við erum örugglega búnir að borða svona þrjátíu pastamáltíðir… en gymið er flott.“
Þeir segjast einnig eyða allt að einum klukkutíma á dag í rússneskunám og reikna með að vera búnir að ná tungumálinu í lok ferðar, síðuritari efast ekki um þetta enda þekkir hann þá báða sem afbrags námsmenn.
Þeir segjast einnig vera mjög ánægðir með Einar og Jónda og vilja að lokum koma á framfæri þökkum heim til Íslands. „Við finnum vel að þið eruð að fylgjast með og styðja okkur og við vonum svo sannarlega að við séum Selfyssingum til sóma.“