Ægismenn léku sinn fyrsta heimaleik í 2. deild karla í knattspyrnu í dag þegar KFA kom í heimsókn til Þorlákshafnar.
Gestirnir komust yfir strax á 7. mínútu leiksins og reyndist það eina mark fyrri hálfleiks. Ægir fékk vítaspyrnu undir lok fyrri hálfleiks en Jordan Aneyemo átti slaka spyrnu og brenndi af.
Staðan var 0-1 í hálfleik en gestirnir tvöfölduðu forystu sína á 56. mínútu. KFA gaf ekki mörg færi á sér en Aron Fannar Hreinsson náði að minnka muninn fyrir Ægi á 75. mínútu eftir góða sókn. Þar við sat, Austfirðingar sigruðu 1-2 og tóku stigin þrjú með sér heim.
Ægir er með eitt stig eftir tvær umferðir en KFA er í toppsætinu með fullt hús stiga.