Síðustu vikur hafa bæjaryfirvöld á Selfossi velt fyrir sér möguleikanum á að byggja yfir KSÍ sparkvelli til þess að þeir nýtist betur yfir vetrarmánuðina.
Málið var rætt á síðasta fundi íþrótta- og tómstundanefndar Árborgar þar sem hluti af kostnaðaráætlun um yfirbyggingu yfir KSÍ sparkvöll var lögð fram.
Tómas Þóroddsson, nefndarmaður S-Lista, lagði til að horfið væri frá þessum hugmyndum og frekar leitað eftir samstarfi við Hveragerðisbæ um nýtingu á nýju Hamarshöllinni næstu árin.
„Á sama tíma ætti að skoða nánar loftborið íþróttahús, til dæmis yfir stóra gervigrasið á Selfossvelli,“ segir í bókun frá Tómasi.
Nefndarmenn meirihlutans þökkuðu Tómasi fyrir góðar ábendingar en ekki lá fyrir fundinum að taka afstöðu af eða á um yfirbyggingu á sparkvellina.