Selfyssingar töpuðu sínum fyrsta leik í B-deild deildarbikars karla í knattspyrnu í vor þegar liðið mætti Víkingi Ó í Akraneshöllinni í dag.
Það varð til þess að lærisveinar Tomaszar Luba í Víkingi hirtu toppsæti riðilsins af Selfyssingum og Ólafsvíkingar fara því í úrslitakeppni deildarbikarsins.
Víkingar voru sterkari aðilinn í dag, þeir skoruðu tvívegis á síðasta korterinu í fyrri hálfleik og bættu svo við þriðja markinu um miðjan seinni hálfleikinn, lokatölur 3-0.
Víkingur og Selfoss eru bæði með 12 stig í 1. og 2. sæti riðilsins en Víkingar hafa betra markahlutfall. Reynismenn frá Sandgerði geta reyndar hirt toppsætið af Víkingum en til þess þurfa þeir að vinna KFG 11-0 í lokaumferðinni.