Eftir þrjá sigurleiki í röð í 2. deildinni var Selfyssingum kippt niður á jörðina með 2-0 tapi gegn Víkingi Ólafsvík í Ólafsvík í kvöld.
Lærisveinar Tomasz Luba voru þéttir fyrir í kvöld og ákveðnari fram á við og þeir komust yfir á 32. mínútu með marki frá Ingvari Þorsteinssyni. Staðan var 1-0 í hálfleik en þegar korter var liðið af seinni hálfleiknum fengu heimamenn vítaspyrnu og úr henni skoraði markahrókurinn Guðmundur Magnússon.
Selfoss er áfram í 2. sæti deildarinnar með 29 stig en Víkingur lyfti sér upp í 5. sætið með 25 stig og er enn með í baráttunni um 2. sætið.