Viðar Örn Kjartansson skoraði tvívegis þegar Selfoss sigraði Sindra 5-0 í B-deild deildarbikars karla í knattspyrnu á Leiknisvellinum í dag. Þetta var fyrsti leikur Viðars fyrir Selfoss í fjórtán ár.
Leikurinn átti að fara fram á Selfossvelli en það kyngdi niður snjó á Selfossi í morgun og vegna heitavatnsskorts hjá sveitarfélaginu hefur ekki verið hægt að kynda gervigrasvöllinn. Sindramenn lögðu af stað frá Hornafirði snemma í morgun og til þess að ferðalagið færi ekki forgörðum var ákveðið að færa leikinn til Reykjavíkur.
Selfyssingar léku á als oddi í leiknum, Elías Karl Heiðarsson kom þeim yfir á 28. mínútu og fimm mínútum síðar opnaði Viðar markareikninginn. Hann var svo aftur á ferðinni á 39. mínútu og staðan var 3-0 í hálfleik.
Elvar Orri Sigurbjörnsson hefur raðað inn mörkum í deildarbikarnum og hann kom Selfyssingum í 4-0 á 66. mínútu og það var svo Elías Karl sem innsiglaði 5-0 sigur Selfoss með marki á 82. mínútu.
Selfoss er á toppi riðils-2 í B-deildinni með 12 stig og mætir Víkingi í Ólafsvík um næstu helgi og sigurliðið í þeim leik mun tryggja sér sigur í riðlinum.