Viðar Örn Kjartansson skoraði mark Íslands sem tapaði 2-1 gegn Danmörku í Þjóðadeild UEFA á Parken í Kaupmannahöfn í kvöld.
Danir komust yfir þegar þeir fengu ódýra vítaspyrnu í fyrri hálfleik og staðan var 1-0 í leikhléi.
Viðar Örn kom inná á 71. mínútu fyrir Jón Daða Böðvarsson og lét strax til sín taka í sóknarleik Íslands. Á 85. mínútu fékk hann góða sendingu innfyrir frá Ara Frey Skúlasyni og kláraði færið ákaflega vel, 1-1.
Fimm mínútum síðar fengu Danir aðra vítaspyrnu og úr henni kom sigurmarkið. Grátleg úrslit fyrir Íslendinga sem stóðu sig vel í leiknum, sérstaklega í seinni hálfleik.
Næsti leikur Íslands er gegn Englendingum á Wembley næstkomandi miðvikudag.