Selfoss vann gríðarlega mikilvægan sigur á KFA í 2. deild karla í knattspyrnu í dag. Lokatölur í Neskaupstað urðu 0-1.
Leikurinn var fjörugur á upphafsmínútunum, bæði lið fengu fín færi og Viðar Örn Kjartansson átti meðal annars stangarskot á 10. mínútu. Þrátt fyrir fínar sóknir var fyrri hálfleikur markalaus.
Heimamenn þjörmuðu að Selfyssingum á upphafsmínútum seinni hálfleiks en Selfossvörnin hélt velli. Þeir vínrauðu sköpuðu sér betri færi og ísinn brotnaði loks á 70. mínútu þegar Viðar Örn Kjartansson skoraði með skoti af stuttu færi eftir frábæran undirbúning Elíasar Heiðarssonar.
Lokamínúturnar voru fjörugar, bæði lið fengu færi og heimamenn heimtuðu tvær vítaspyrnur sem þeir fengu ekki og Selfoss lokaði leiknum af fagmennsku og tryggði sér 0-1 sigur.
Með sigrinum lyftu Selfyssingar sér upp í 2. sætið með 23 stig en KFA er í 8. sæti með 14 stig.