Knattspyrnumaðurinn Viðar Örn Kjartansson hefur skrifað undir þriggja ára samning við uppeldisfélag sitt, Selfoss.
Viðar Örn, sem er 35 ára gamall, hefur komið víða við á sínum magnaða knattspyrnuferli síðan hann spilaði með Selfossi síðast árið 2012. Hann hefur skorað yfir 200 mörk á ferlinum og spilað í Noregi, Kína, Svíþjóð, Ísrael, Rússlandi, Grikklandi, Tyrklandi og Búlgaríu. Hann spilaði nú síðast með KA í Bestu deildinni.
Samhliða því að leika með liðinu mun Viðar sækja sér menntun sem knattspyrnuþjálfari en í tilkynningu frá Selfyssingum segir að þar á bæ bindi menn miklar vonir við að innkoma Viðars muni hafa jákvæð áhrif til framtíðar fyrir alla aðila.
„Viðar hefur flutt búferlum á Selfoss og lá því beinast við að taka slaginn með uppeldisfélagi sínu. Á traustum grunni mun hann halda áfram þeirri vegferð sem hófst seint á síðasta ári. Með markvissri þjálfun, andlegri- og líkamlegri, er knattspyrnudeild Selfoss ekki í nokkrum vafa um að innkoma hans í liðið hafa jákvæð áhrif á árangur liðsins á komandi árum,” segir Þorsteinn Haukur Harðarson, formaður meistaraflokksráðs karla.
