Selfyssingar eru komnir í 32-liða úrslit í bikarkeppni karla í knattspyrnu þetta sumarið eftir 7-1 sigur á 3. deildarliði Augnabliks á Selfossvelli í kvöld.
Aron Fannar Birgisson kom Selfyssingum yfir strax á 5. mínútu og á 13. mínútu tvöfaldaði Viðar Örn Kjartansson forskotið með marki úr vítaspyrnu. Viðar var ekki hættur því hann kórónaði þrennu sína með tveimur mörkum á síðustu fjórum mínútum fyrri hálfleiks en áður hafði fyrirliðinn Daði Kolviður Einarsson skorað með þrumuskoti af löngu færi, 5-0 í hálfleik.
Seinni hálfleikurinn var öllu rólegri. Augnablik minnkaði muninn í 5-1 á 57. mínútu en Selfyssingar voru sterkari á lokakaflanum og skoruðu tvisvar á síðasta korterinu. Elías Karl Heiðarsson skoraði á 75. mínútu og Aron Darri Auðunsson innsiglaði svo 7-1 sigur Selfoss á 89. mínútu.
Selfoss mætir úrvalsdeildarliði Stjörnunnar í 32-liða úrslitunum og fer leikurinn fram um næstu helgi.