Selfoss vann mikilvægan sigur á KFG í 2. deild karla í knattspyrnu í kvöld. Liðin mættust á teppinu í Garðabænum og lokatölur urðu 2-3.
Liðin voru í smá stund að þreifa fyrir sér en Selfyssingar ógnuðu meira og Viðar Örn Kjartansson kom þeim yfir á 33. mínútu. Uppskriftin var einföld, langur fram þar sem boltinn endaði hjá Jóni Daða Böðvarssyni. Hann renndi honum á Viðar sem skoraði með hnitmiðuðu skoti af vítateigslínunni.
KFG jafnaði metin á 42. mínútu með marki úr vítaspyrnu en rúmri mínútu síðar áttu Selfyssingar skyndisókn. Skot Jóns Daða fór í varnarmann og frákastið hrökk til Viðars sem skoraði auðveldlega, 1-2 í hálfleik.
Garðbæingar byrjuðu betur í seinni hálfleik og náðu að jafna metin strax á 47. mínútu eftir hornspyrnu. Leikurinn var í járnum næstu mínúturnar en um miðjan seinni hálfleikinn skoraði Viðar sitt þriðja mark og reyndist það sigurmark leiksins. Eysteinn Ernir Sverrisson átti þá sendingu inn á vítateiginn, markvörður og varnarmaður KFG fóru báðir í boltann sem hrökk í stöngina og hver var mættur? Viðar á auðum sjó og púttaði honum í netið.
Selfoss er með 19 stig í 3. sæti deildarinnar en KFG er í 9. sætinu með 12 stig.