Selfoss tapaði gegn Fylki í Pepsi Max deild kvenna í knattspyrnu, á gríðarlega svekkjandi hátt á Selfossvelli í dag.
„Þær nýta sín færi, við ekki. Það er bara skandall að við nýtum ekki færin okkar. Við vorum sjálfum okkur verstar upp við markið. Við sköpuðum fullt af færum og ég held að þetta hafi verið einn af okkar betri leikjum í sumar. En fótboltinn snýst um að skora mörk og við gerðum það ekki. Við getum ekki kennt neinum öðrum en okkur sjálfum um þetta tap í dag,“ sagði Alfreð Elías Jóhannsson, þjálfari Selfoss í samtali við sunnlenska.is eftir leik.
Níutíu mínútna sókn skilaði engu
Þær vínrauðu voru sterkari aðilinn allan leikinn og sóttu án afláts án þess að ná að skora. Færin vantaði ekki, en færanýtin Selfyssinga var afleit og Cecilia Rán Rúnarsdóttir átti stórleik í marki Fylkis.
Fylkiskonur voru ekki mikið að slíta grasið á vallarhelmingi Selfyssinga en þær áttu nokkrar ágætar sóknir inn á milli og sú síðasta skilaði sigurmarki á lokamínútu leiksins.
Lokatölur leiksins urðu 0-1 og Selfyssingar eru nú komnir niður í 6. sæti deildarinnar, með tíu stig, þremur stigum frá fallsæti.