Viðurkenningar til Skarphéðinsmanna

Í tilefni 100 ára afmælis Alþjóða Frjálsíþróttasambandsins var Frjálsíþróttasambandi Íslands falið að úthluta viðurkenningum til þrjátíu einstaklinga hér á landi fyrir framlag þeirra til íþróttarinnar.

Nokkrir Sunnlendingar og núverandi eða fyrrverandi forystufólk í frjálsíþróttum í héraði voru á meðal þeirra sem fengu viðurkenningu. Þau sem hlutu sérstakt viðurkenningarskjal IAAF voru Aðalbjörg Hafsteinsdóttir, Helgi S. Haraldsson og Ólafur Guðmundsson.

Þau sem hlutu sérstakan minnispening IAAF af tilefninu voru þau Valgerður Auðunsdóttir, Vésteinn Hafsteinsson, Þórdís Gísladóttir og Þráinn Hafsteinsson.

Við úthlutun var horft til þeirrar fjölbreyttu flóru einstaklinga sem hafa lagt hreyfingunni lið á undanförnum aldarfjórðungi. Við mat var horft til umfangs starfs, árangurs að því marki sem það er raunhæft til samanburðar og fjölbreytileika í störfum. Horft var líka til hefðbundinna þátta eins og búsetu, starfsvettvangs og kynjahlutfalls.

Leitast var við að dreifing viðurkenninganna endurspeglaði þá fjölbreyttu flóru einstaklinga og hjóna sem leggja hönd á plóg og hafa byggt upp þessa hreyfingu og gert hana að því sem hún er.

Afhending viðurkenninganna fór fram á uppskeruhátíð FRÍ í lok október. Síðast fékk FRÍ viðurkenningar af þessu tagi til úthlutunar á 75 ára afmæli IAAF, árið 1987.