Ægir tók á móti Vestra í 1. deild karla í knattspyrnu á Þorlákshafnarvelli í dag. Eftir hörkuleik höfðu Vestramenn betur, 1-2.
Það var fátt um færi í fyrri hálfleik, Vestramenn voru nær því að skora en Ægismönnum gekk lítið á síðasta þriðjungnum.
Staðan var 0-0 í hálfleik en ekki voru nema 10 sekúndur liðnar af seinni hálfleiknum þegar Ægismenn skoruðu frábært mark. Harley Willard setti boltann þá í netið eftir góðan undirbúning Kristins Ásgeirs Þorbergssonar.
Síðasta hálftímann stýrðu gestirnir leiknum og þeir náðu að jafna á 72. mínútu með glæsimarki. Sigurmarkið kom svo aðeins fjórum mínútum síðar og Vestri hélt fengnum hlut þó að Ægismenn hefðu þjarmað að þeim á lokakaflanum.
Ægismenn eru á botni deildarinnar, án stiga eftir fjórar umferðir en Vestri lyfti sér tímabundið upp í 2. sætið með 7 stig eftir sigurinn í dag.