Ægir tók á móti Vestra í A-deild Lengjubikars karla í knattspyrnu í Akraneshöllinni í dag. Liðin leika bæði í 1. deildinni í sumar og því um áhugaverða viðureign að ræða.
Leikurinn var markalaus allt fram á lokamínútu fyrri hálfleiks að Vestramenn komust yfir. Staðan var 0-1 í hálfleik en Jordan Adeyemo jafnaði metin fyrir Ægi strax á 5. mínútu síðari hálfleiks.
Þar við sat, allt þar til í uppbótartímanum að Vestramenn náðu að skora sigurmarkið og lokatölur urðu 1-2.
Ægismenn eru í neðsta sæti riðils-1 í A-deildinni, án stiga, en Vestri er í 3. sætinu með 3 stig.