Uppskeruhátíð yngri flokka hjá Hestamannafélaginu Sleipni á Selfossi fór fram síðastliðinn fimmtudag í félagsheimilinu Hliðskjálf.
Hátíðin heppnaðist vel í alla staði en boðið var upp á mat og ýmsa leiki og var þátttakan góð.
Knapi ársins 2025 í barnaflokki var Svala Björk Hlynsdóttir en auk hennar voru tilnefndar þær Gabríela Máney Gunnarsdóttir, Kamilla Nótt Jónsdóttir og Sigrún Freyja Einarsdóttir.
Í unglingaflokki var knapi ársins Elsa Kristín Grétarsdóttir en auk hennar voru tilnefnd þau Loftur Breki Hauksson, Vigdís Anna Hjaltadóttir og Viktor Óli Helgason.
Fleiri viðurkenningar voru veittar á uppskeruhátíðinni. Pollarnir fengu sérstakar viðurkenningar, knapar sem kepptu á Íslandsmeistaramótinu fengu viðurkenningar sem og knapar sem luku Knapamerki 1.
