Aðalfundur Umf. Heklu fór fram síðastliðinn miðvikudag að viðstöddum rúmlega 30 fundargestum. Veittar voru viðurkenningar fyrir árangur í íþróttum vegna 2025 og hlaut fjöldi íþróttamanna tilnefningu.
Í ár var Frosti Snær Laxdal útnefndur bjartasta vonin, Vikar Reyr Víðisson efnilegasti íþróttamaður ársins og Veigar Þór Víðisson íþróttamaður ársins. Allir voru þeir tilnefndir vegna árangurs í frjálsíþróttum.
Þá var kvennablaki Dímon/Heklu veitt viðurkenning fyrir framlag þeirra til íþróttastarfs Umf. Heklu.
Ný stjórn var kjörin á fundinum og hana skipa Ástþór Jón Ragnheiðarson formaður en aðrir í stjórn voru kjörnir Gunnlaugur F. Margrétarson, Dóra Steinsdóttir, Elfa Ósk Guðlaugsdóttir og Írena Rós Haraldsdóttir. Varamenn voru kjörnir Gunnar Aron Ólason og Ösp Viðarsdóttir.
