Stokkseyri tók á móti Hömrunum í toppslag í 5. deild karla í knattspyrnu í dag. Uppsveitir fengu Afríku í heimsókn.
Það var hart barist á Stokkseyri í dag þar sem sterkt lið Hamranna frá Akureyri kom í heimsókn. Hamrarnir komust yfir á 17. mínútu og staðan var 0-1 í hálfleik. Gestirnir tvöfölduðu forystuna á 79. mínútu og útlitið orðið svart fyrir Stokkseyri. En það birti til á lokakaflanum, varamennirnir Leifur Þór Leifsson og Karl Jóhann Einarsson skoruðu sitthvort markið á síðustu tveimur mínútunum og björguðu stigi fyrir Stokkseyri. Lokatölur 2-2 á Eyrinni.
Gleðin var öllu minni á Laugarvatni þar sem Afríka heimsótti Uppsveitir. Elian Rivas kom Uppsveitum yfir strax á 2. mínútu og staðan var 1-0 í hálfleik. Afríka jafnaði metin á upphafsmínútum seinni hálfleiks og gestirnir náðu svo að knýja fram sigurmark þegar sex mínútur voru til leiksloka. Úrslitin 1-2 en þetta var fyrsti sigur Afríku í sumar.
Staðan í 5. deildinni er þannig að Uppsveitir eru í 6. sæti í A-riðlinum með 9 stig en í B-riðlinum eru Stokkseyringar í 2. sæti með 17 stig, tveimur stigum á eftir toppliði Hamranna.