Kvennalið Selfoss tapaði stórt í sínum fyrsta heimaleik í Olísdeildinni í handbolta í vetur en Valskonur komu í heimsókn á Selfoss í dag.
Valur leiddi allan tímann en munurinn var lítill fyrstu tuttugu mínúturnar. Þá kom góður kafli Vals sem breytti stöðunni úr 6-8 í 8-14 og þannig stóðu leikar í hálfleik. Munurinn varð mestur tíu mörk í seinni hálfleiknum og ljóst að Valur myndi fara til baka yfir Heiðina með stigin tvö. Lokatölur urðu 18-27.
Roberta Stropus var markahæst Selfyssinga með 11 mörk en hún skoraði 6 síðustu mörk Selfoss í leiknum. Katla María Magnúsdóttir skoraði 4, Rakel Guðjónsdóttir 2 og Elínborg Katla Þorbjörnsdóttir 1.
Cornelia Hermansson varði vel á köflum í sínum fyrsta leik fyrir Selfoss. Hún klukkaði 11 bolta og þar af tvö vítaköst.