Ægir tapaði fimmta leiknum í röð þegar liðið tók á móti Njarðvík í 1. deild karla í knattspyrnu á Þorlákshafnarvelli í kvöld. Njarðvík sigraði 0-1.
Eina mark leiksins kom strax á 3. mínútu og það skoraði Selfyssingurinn Valdimar Jóhannsson eftir mistök í vörn Ægis. Njarðvíkingar höfðu góð tök á leiknum í fyrri hálfleik en fátt var um færi.
Ægir komst betur inn í leikinn í seinni hálfleiknum en færin voru áfram af skornum skammti og Njarðvíkingar héldu forskotinu allt til leiksloka.
Ægir er áfram í neðsta sæti deildarinnar með 8 stig en Njarðvík er í 4. sætinu með 29 stig.