Sunnlendingurinn Valgerður E. Hjaltested náði frábærum árangri á Evrópumeistaramótinu í bogfimi innanhús í síðustu viku í Plovdiv í Búlgaríu.
Í einstaklingskeppni sveigboga kvenna endaði Vala undankeppnina í 20. sæti með 562 stig, aðeins tveimur stigum frá Íslandsmetinu sem er 564 stig. Þetta er besti árangur Völu til þessa og skilaði henni sæti í 32-liða úrslitum.
Þar mætti hún Hanna Marusava frá Belarús, þar sem Vala var algjörlega óstöðvandi og vann öruggan 6-2 sigur. Í 16-manna úrslitunum mætti hún svo Veronika Marchenko, fyrrum heims- og Evrópumeistara frá Úkraínu. Marchenko átti útrúlegan leik, var með fullkomið skor í öllum umferðum og sigraði 6-0. Vala endaði því í 9. sæti í einstaklingskeppninni.
Í blandaðri liðakeppni komust Vala og Ari Emin Björk í 16-liða úrslit þar sem þau mættu pari frá Georgíu. Leikurinn var hnífjafn en lauk að lokum með 5-1 sigri Georgíu.
Í liðakeppni sveigboga kvenna endaði Vala síðan í 7. sæti ásamt ásamt þeim Astrid Daxbock og Marín Anítu Hilmarsdóttur. Undankeppnisskor þeirra var upp á 1.610 stig sem er nýtt Íslandsmet. Stelpurnar voru slegnar út í 8-liða úrslitum á móti Úkraínu þar sem Ísland átti góðan leik en Úkraína enn betri og gaf ekkert færi á sér. Vala og liðsfélagar hennar enduðu því í 7. sæti á EM í liðakeppninni.