Selfoss vann mikilvægan sigur þegar liðið heimsótti topplið Hauka í 2. deild karla í knattspyrnu í dag. Lokatölur urðu 1-2 og Selfoss er því í 2. sætinu fyrir lokaumferðina um næstu helgi.
Selfyssingar mættu af krafti til leiks og Frosti Brynjólfsson kom þeim yfir strax á 3. mínútu eftir misheppnað úthlaup markmanns Hauka. Frosti var svo aftur á ferðinni með glæsilegu marki á 33. mínútu þegar hann lét vaða fyrir utan teig eftir snarpa sókn.
Staðan var 0-2 í hálfleik og Selfyssingar voru manni fleiri síðustu 45 mínúturnar eftir að leikmaður Hauka fékk sitt annað gula spjald þegar tíu sekúndur voru liðnar af seinni hálfleiknum. Þrátt fyrir að vera manni færri voru Haukarnir sprækari í seinni hálfleiknum og þeir náðu að minnka muninn á 71. mínútu. Haukarnir náðu ekki að jafna, þrátt fyrir fín færi á lokakaflanum og Selfoss fagnaði mikilvægum sigri.
Þegar þetta er skrifað eru Káramenn komnir langleiðina með að sigra Magna og því ljóst að úrslitin munu ráðast í lokaumferðinni. Selfoss er með 42 stig í 2.. sæti en Kári með 39 stig í 3. sætinu og betra markahlutfall. Kári mætir Haukum í lokaumferðinni á meðan Selfoss fær KFG í heimsókn og þar þarf Selfoss að ná í stig til þess að tryggja sér sæti í 1. deildinni að ári.