Uppsveitir og Stokkseyri unnu sína leiki Uppsveitir unnu góðan sigur á KFS í 5. deild karla í knattspyrnu í dag á sama tíma og Stokkseyri lagði Kríu örugglega.
Uppsveitir og KFS mættust á Laugarvatni og þar kom Auðunn Ingi Hafsteinsson Uppsveitum yfir eftir fimmtán mínútna leik. Uppsveitir voru nær því að bæta við marki í fyrri hálfleiknum en staðan var 1-0 í hálfleik. Varamaðurinn Jose Martinez fór svo langt með að gera út um leikinn þegar hann kom Uppsveitum í 2-0 á 69. mínútu. Það voru hins vegar Eyjamenn sem áttu lokaorðið, þeir minnkuðu muninn í 2-1 á 89. mínútu og þar við sat.
Krían var mætt á Stokkseyri en þar komust heimamenn í 1-0 á 8. mínútu með marki frá Ingva Rafni Óskarssyni. Staðan var 1-0 í leikhléi en í seinni hálfleik tók mörkunum að rigna. Arilíus Óskarsson kom Stokkseyri í 2-0 á 49. mínútu og tveimur mínútum síðar breytti David Örn Aitken Sævarsson stöðunni í 3-0. David var svo aftur á ferðinni á 83. mínútu en Krían goggaði frá sér tveimur mínútum síðar og lokatölur leiksins urðu 4-1.
Staðan í 5. deildinni er þannig að Uppsveitir eru í 2. sæti í A-riðlinum með 9 stig en í B-riðlinum er Stokkseyri í 4. sæti með 4 stig.