Róðurinn heldur áfram að þyngjast hjá Uppsveitum í 4. deild karla í knattspyrnu. Liðið tók á móti Tindastóli á Flúðum í dag.
Gestirnir frá Sauðárkróki voru líklegri í fyrri hálfleiknum, án þess þó að skapa sér mikið af færum. Á 22. mínútu skoraði David Toro glæsilegt mark fyrir Tindastól, sláin inn af löngu færi. Þetta reyndist sigurmark leiksins.
Uppsveitir voru sterkari aðilinn í seinni hálfleiknum en heimamönnum voru mislagðir fætur upp við mark Tindastóls. Lokatölur á Flúðum urðu því 0-1.
Uppsveitir eru áfram á botni deildarinnar án stiga en Tindastóll lyfti sér upp í 4. sætið með sigrinum með 17 stig.