Uppsveitir heimsóttu Þorlák á Álftanesvöll í 5. deild karla í knattspyrnu í kvöld. Þetta var fyrsti leikur Uppsveita á Íslandsmótinu í sumar og þeir fögnuðu 2-3 sigri.
Reynir Ingi Helgason kom Uppsveitum yfir undir lok fyrri hálfleiks og staðan var 0-1 í leikhléi. Uppsveitir byrjuðu vel í seinni hálfleik og Teitur Snær Vignisson kom þeim í 0-2 á 52. mínútu. Jaime Riveriego gerði svo nánast út um leikinn þegar hann skoraði þriðja markið á 70. mínútu.
Þorlákur átti hins vegar lokaorðið. Sölvi Freyr Freydísarson varð fyrir því óláni að skora sjálfsmark á 81. mínútu og þremur mínútum síðar fékk hann að líta rauða spjaldið. Þorlákur hresstist við þetta og náði að minnka muninn í 2-3 á fjórðu mínútu uppbótartíma en Uppsveitamenn héldu út og fögnuðu sanngjörnum sigri.