Uppsveitir unnu góðan sigur á Ými í fyrsta leik sínum í deildarbikar karla í knattspyrnu í dag. Á sama tíma tapaði Ægir gegn Þrótti Vogum.
Uppsveitir mættu Ými á gervigrasvellinum við Kórinn í Kópavogi. Þar kom Víkingur Freyr Erlingsson Uppsveitum yfir á 36. mínútu en þremur mínútum síðar jöfnuðu Ýmismenn leikinn og staðan var 1-1 í hálfleik.
Benedikt Fadel Farag kom Uppsveitum aftur yfir á 67. mínútu og Máni Snær Benediktsson innsiglaði svo 1-3 sigur þeirra á lokamínútu leiksins.
Uppsveitir hafa 3 stig í 3. sæti riðils 3 í C-deildinni.
Í B-deildinni heimsótti Ægir Þrótt Vogum á Leiknisvöllinn í Breiðholti. Þróttarar voru mun sterkari í leiknum og komust í 3-0 í fyrri hálfleik. Arilíus Óskarsson minnkaði muninn í upphafi seinni hálfleiks en Þróttarar áttu lokaorðið og fjórða mark þeirra leit dagsins ljós á 76. mínútu.
Lokatölur 4-1 og Ægir er í botnsæti riðils 1 í B-deildinni, án stiga eftir þrjá leiki.