Uppskeruhátíð yngri flokka Hestamannafélagsins Sleipnis var haldin hátíðleg í gærkvöldi í félagsheimili félagsins, Hliðskjálfi. Æskulýðsnefnd Sleipnis stóð að hátíðinni sem var bæði glæsileg og skemmtileg og gaf tilefni til að fagna góðu starfi og frábærum árangri ungra Sleipnisfélaga á árinu.
Veittar voru viðurkenningar í polla-, barna- og unglingaflokki auk þess sem þau sem luku Knapamerki 1 og 2 fengu sérstaka viðurkenningu. Fjórum stigahæstu knöpum í barna- og unglingaflokki voru einnig veittar sérstakar viðurkenningar og verðlaunaðir voru stigahæstu knapar ársins.
Sigrún Freyja Einarsdóttir varð stigahæsti knapinn í barnaflokki árið 2026. Hún tók miklum framförum á árinu og keppti mikið með góðum árangri á hesti sínum, Silfurtoppi frá Kópavogi.
Loftur Breki Hauksson varð stigahæsti knapinn í unglingaflokki árið 2026. Hann átti afar gott keppnistímabil þar sem hæst ber Íslandsmeistaratitil í tölti, T1 unglinga, auk þess sem hann hafnaði í öðru sæti í unglingaflokki á Landsmóti hestamanna.
Betubikarinn
Betubikarinn, sem gefinn er af Elísabetu Sveinsdóttur, er veittur því ungmenni sem þykir hafa skarað fram úr og verið áberandi á árinu, óháð keppnisárangri. Í ár hlaut Kamilla Nótt Jónsdóttir Betubikarinn. Kamilla Nótt hefur verið afar öflug og jákvæð í félagsstarfinu. Hún er hjálpsamur og duglegur sjálfboðaliði sem er ávallt tilbúin að leggja sitt af mörkum og aðstoða þar sem þörf er á. Hún er góð fyrirmynd fyrir aðra unga Sleipnisfélaga og vel að bikarnum komin.
Árangur og framfarir ungra Sleipnisfélaga voru mjög áberandi á árinu. Því má meðal annars þakka öflugu starfi æskulýðsnefndar sem býður upp á fjölbreytt og metnaðarfullt starf þar sem allir geta fundið eitthvað við sitt hæfi og getu. En fyrst og fremst er árangurinn ungu Sleipnisfélögunum sjálfum að þakka. Þau leggja sig fram af mikilli samviskusemi, dugnaði og metnaði.