Uppsagnir og endurskipulagning hjá Umf. Selfoss

Báðum starfsmönnum Ungmennafélags Selfoss verður sagt upp störfum vegna stefnumótunarvinnu sem framundan er hjá félaginu.

Örn Guðnason hefur gegnt starfi framkvæmdastjóra félagsins undanfarin ár og Hansína Kristjánsdóttir hefur verið í hálfu starfi sem bókari. Bæði hafa þau þriggja mánaða uppsagnarfrest.

Kristín Bára Gunnarsdóttir, formaður Umf. Selfoss, sagði í samtali við sunnlenska.is að í stefnumótunarvinnunni sem framundan er verði farið í gegnum skipurit félagsins og þar á meðal er endurmat á þeim störfum sem nú eru á aðalskrifstofu félagsins.

“Til þess að skapa nauðsynlegt svigrúm til þeirra breytinga verður báðum starfsmönnum félagsins sagt upp. Það hefur engin ákvörðun verið tekin ennþá um framhaldið í starfsmannamálum þar sem það ræðst af því sem kemur út úr stefnumótunarvinnunni,“ sagði Kristín Bára í samtali við sunnlenska.is.

Kristín Bára segir spennandi tíma framundan hjá Ungmennafélagi Selfoss sem hefur nú til afnota eina glæsilegustu íþróttaaðstöðu landsins með öllum þeim framkvæmdum sem hafa farið fram á íþróttamannvirkjum á undanförnum árum.

„Aðstaðan hefur gerbreytt þeim tækifærum sem félagið í heild sinni getur nú nýtt sér og einstakar deildir innan þess og til þess að aðlaga okkur að þessu nýja umhverfi er ungmennafélagið að fara í stefnumótunarvinnu til næstu fimm ára, sem hefst vonandi í þessum mánuði og verður kláruð fyrir lok janúar 2013 með þátttöku sem flestra,“ sagði Kristín Bára að lokum.