Ungmennafélag Selfoss Fyrirmyndarfélag ÍSÍ

Á aðalfundi Umf. Selfoss, sem haldinn var í lok apríl fékk mótokrossdeild félagsins afhenta viðurkenningu sem Fyrirmyndardeild ÍSÍ.

Deildin varð þar með áttunda og síðasta deildin innan Ungmennafélags Selfoss sem hlýtur þessa viðurkenningu.

Fimleikadeildin fékk fyrstu viðurkenninguna 2007. Síðan komu sunddeild, knattspyrnudeild og handknattleiksdeild 2008, taekwondodeild og frjálsíþróttadeild 2009 og svo júdódeild 2010.

Þegar allar deildir félags eru orðnar Fyrirmyndardeildir hlýtur viðkomandi félag útnefningu sem Fyrirmyndarfélag ÍSÍ.

Ungmennafélag Selfoss fékk afhenta viðurkenningu sem Fyrirmyndarfélag ÍSÍ við upphaf héraðsmóts HSK í sundi 29. maí sl. Örn Guðnason, framkvæmdastjóri Umf. Selfoss, tók þá við viðurkenningu til félagsins úr hendi Sigríðar Jónsdóttur, úr framkvæmdastjórn ÍSÍ.