Unglingalandsmótið verður haldið á Selfossi

Lið HSK gengur inn á völlinn á Unglingalandsmótinu á Höfn í fyrrasumar. sunnlenska.is/Guðmundur Karl

„Við erum afar ánægð að geta haldið Unglingalandsmót UMFÍ um verslunarmannahelgina innan þess ramma sem sóttvarnalæknir og heilbrigðisyfirvöld setja okkur. Farið verður eftir öllum tilmælum yfirvalda um sóttvarnir og gætt að ítrustu vörnum. Fyrir öllu er að yngri kynslóðin getur skemmt sér á heilbrigðan hátt í íþróttum og afþreyingu með foreldrum sínum og vinum á Selfossi um verslunarmannahelgina,“ segir Þórir Haraldsson, formaður framkvæmdanefndar Unglingalandsmótsins á Selfossi.

Þetta kemur fram í tilkynningu sem UMFÍ sendi frá sér í kvöld. Mótið fer fram 31. júlí til 2. ágúst. Það hefur verið haldið frá árinu 1992 og hefur sannað gildi sitt sem glæsileg vímuefnalaus fjölskyldu- og íþróttahátíð þar sem saman kemur fjöldi barna og ungmenna með fjölskyldum sínum.

Þórir segir dagskrá og skipulag mótsins hafa legið fyrir þegar kórónufaraldurinn skall á heimsbyggðinni en þá var allt sett á ís. Nú þegar liggi fyrir að UMFÍ geti haldið mótið með Héraðssambandinu Skarphéðni og Sveitarfélaginu Árborg sé allt sett í gang á ný. Gætt verður að hreinlæti á öllu mótssvæðinu, upplýsingar um COVID hafðar aðgengilegar og mótsgestir minntir á þær. Þá verður tjaldsvæði mótsgesta skipulagt með þeim hætti að reglum verði fylgt.

Mótið er fyrir 11-18 ára börn og ungmenni sem reyna fyrir sér í fjölmörgum íþróttagreinum. Að þessu sinni verður boðið upp á 22 greinar á Unglingalandsmótinu á Selfossi frá morgni til kvölds. Öll kvöldin verða tónleikar í samkomutjaldi á svæðinu.