Ungmennafélag Íslands heiðraði fjóra einstaklinga úr Grímsnes- og Grafningshreppi á héraðsþingi HSK á Borg í Grímsnesi á dögunum. Lísa Thomsen var sæmd gullmerki UMFÍ og Guðrún Ása Kristleifsdóttir, Kjartan Helgason og Hörður Óli Guðmundsson voru sæmd starfsmerki UMFÍ.
Lísa Thomsen á Búrfelli er fyrrverandi formaður Umf. Hvatar og var hún var sæmd gullmerki UMFÍ fyrir áratugastarf fyrir ungmennafélagshreyfinguna. Lísa var formaður Hvatar á níunda áratugnum og var mikill kraftur í starfinu á þessum árum. Á formannsárum hennar, árið 1986, hóf félagið að gefa út Hvatarblaðið, sem enn kemur út. Hún hafði frumkvæði að fleiri nýjungum í starfi félagsins, s.s skíðaferðum í Bláfjöll og Skálafell og þá tók hún þátt í að endurvekja glímuiðkun innan félagsins.
Lísa tók einnig þátt í störfum HSK til áratuga. Fyrsta verkefni hennar á þeim vettvangi var þátttaka í frægri Landgræðsluferð HSK árið 1967. Lísa átti sæti í sögu- og minjanefnd HSK frá 1993 til 2019 eða í 26 ár og var um tíma formaður nefndarinnar. Nefndarfólk í þeirri góðu nefnd vann mikið starf í tengslum við útgáfu á 100 ára sögu HSK sem kom út 2010. Lísa, líkt og aðrir nefndarmenn, las allan texta yfir, safnaði myndum og heiðursáskriftum. Lísa hélt áfram að taka að sér verkefni fyrir HSK og allt til ársins 2023 var hún ein af prófarkalesurum ársskýrslu HSK. Fyrir þessi störf og önnur fyrir HSK og hreyfinguna í áratugi var hún sæmd gullmerki HSK árið 2012.
Þrjú starfsmerki UMFÍ
Guðrún Ása hefur tekið virkan þátt í starfsemi ungmennafélagshreyfingarinnar um árabil. Hún hefur verið formaður Umf. Hvatar í átta ár, árið 2024 tók hún sæti í stjórn HSK og er einnig í Unglingalandsmótsnefnd HSK. Hún situr einnig í stjórn frjálsíþróttadeildar Umf. Selfoss og þar sem annars staðar er hún dugleg að vinna þau sjálfboðaliðsstörf sem til falla.
Hörður Óli var lengi í forystusveit Umf. Hvatar, en hann var gjaldkeri félagsins í um tvo áratugi allt til ársins 2016. Á þeim árum mætti hann oft á héraðsþing HSK sem fulltrúi síns félags. Hörður Óli hefur lengi verið áhugamaður um glímu og þess má geta þess að hann hefur verið skoðunarmaður reikninga hjá Glímuráði HSK í um 25 ár, líklega frá stofnun ráðsins rétt fyrir aldamót og allt til þessa dags.
Kjartan Helgason í Haga kom að því að endurvekja glímuna innan Umf. Hvatar um 1980 og átti stóran þátt í endurreisn glímunnar innan HSK. Hann átti sæti í glímunefnd HSK um árabil. Kjartan var nýlega sæmdur gullmerki Glímusambandsins.