Umf. Njáli vikið úr HSK

Á fundi stjórnar Héraðssambandsins Skarphéðins þann 11. janúar síðastliðinn var ákveðið að víkja Ungmennafélaginu Njáli í V-Landeyjum úr HSK með vísan í lög sambandsins.

Í 6. grein laga HSK er kveðið á um skyldur félaga sem eru í hreyfingunni. Þar er félögum gert skylt að halda aðalfund árlega og senda ársreikning til stjórnar HSK að fundi loknum. Þá þurfa félög að skila starfsskýrslu til ÍSÍ og UMFÍ og greiða skatt til HSK fyrir hvern skattskyldan félagsmann.

Ef félag stendur ekki við þessar skuldbindingar, telst það ekki starfandi og skal stjórn HSK þá vísa því úr sambandinu að undangenginni aðvörun.

Á fundi stjórnar HSK 30. nóvember síðastliðinn var ákveðið að senda þeim félögum sem uppfylla ekki ákvæði 6. greinarinnar formlega aðvörun. Þrjú félög fengu senda aðvörun og voru þau beðin um að ganga frá sínum skuldbindum fyrir áramót. Tvö félög gengu frá sínum málum, en engin svör bárust frá Njáli fyrir tilskilinn frest.

Í tilkynningu frá stjórn HSK er Umf. Njáli þakkað samstarfið á liðnum áratugum. Félaginu er velkomið að sækja um aðild að nýju, ef aðstæður breytast og vilji er til þess hjá félagsmönnum.