Á fundi stjórnar Héraðssambandsins Skarphéðins þann 9. janúar síðastliðinn var ákveðið að víkja Umf. Ásahrepps úr HSK með vísan í lög sambandsins.
Í lögum HSK kemur fram að aðildarfélögum sambandsins sé skylt að halda aðalfund árlega og senda ársreikning til stjórnar HSK að fundi loknum. Þá þurfi félög að skila árlegri starfsskýrslu og greiða skatt til HSK fyrir hvern félagsmann 7 ára og eldri. Ef félag stendur ekki við þessar skuldbindingar, telst það ekki starfandi og skal stjórn HSK þá vísa því úr sambandinu að undangenginni aðvörun.
Á fundi stjórnar HSK þann 16. janúar 2017 var Umf. Ásahrepps send formleg aðvörun þar sem stjórn félagsins var beðin um að ganga frá sínum skuldbindum fyrir 1. mars 2017. Þá var tekið fram að ef ekkert yrði að gert myndi félaginu verða vikið úr sambandinu um næstu áramót, þ.e. 31. desember 2017.
Engin svör bárust frá félaginu fyrir tilskilinn frest.
Stjórn HSK þakkar Umf. Ásahrepps samstarfið á liðnum áratugum en félaginu er velkomið að sækja um aðild að nýju, ef aðstæður breytast og vilji er til þess hjá félagsmönnum.
Ungmennafélag Ásahrepps var stofnað þann 21. janúar árið 1911.