Knattspyrnufélag Rangæinga heimsótti Elliða í Árbæinn í 4. deild karla í knattspyrnu í kvöld. Eftir hörkuleik hafði Elliði 4-1 sigur.
Heimamenn komust yfir á 9. mínútu og bættu svo við öðru marki á þeirri 40. svo að staðan var 2-0 í hálfleik. Rangæingar byrjuðu betur í seinni hálfleiknum og uppskáru snemma vítaspyrnu sem Helgi Valur Smárason skoraði úr.
Elliði svaraði fyrir sig um miðjan seinni hálfleikinn og staðan var 3-1 þegar 25 mínútur voru eftir af leiknum. KFR átti enga ása uppi í erminni og róðurinn þyngdist enn frekar þegar fimm mínútur voru eftir en þá fékk Aron Birkir Guðmundsson að líta rauða spjaldið.
Aron fór í tæklingu með takkana á lofti en fór ekki í andstæðinginn og voru Rangæingar afar ósáttir við úrskurð dómarans. Raunar svo ósáttir að Ellert Geir Ingvason, forráðamaður liðsins, var sömuleiðis sendur af bekknum upp í stúku með rautt spjald á bakinu.
Manni færri tókst KFR ekki að minnka muninn en Elliði bætti fjórða markinu við þegar tvær mínútur voru eftir og lokatölur urðu 4-1.
KFR er í 7. sæti deildarinnar með 8 stig en Elliði er í 4. sæti með 13 stig.